Гордана Јанакиевска е претседател и продукт менаџер на здружението Кингмарколенд чија цел е промоција на Македонија пред странските и домашните туристи.
Здружението КИНГМАРКОЛЕНД /Земјата на кралот Марко/ е формирано во 2005 првично како МАРКОКУЛТ, со идеја на првично проучување на времето и топонимите кои како траги на овие простори ги оставил Кралот Марко.
Со годините дошле до сознание дека е тоа еден прекрасен период полн со легенди, интересни простори, специфична храна, заборавени места. Тоа им дало можност да формираат специфична туристичка понуда, туризам низ легенди кој довел до програмата КИНГМАРКОЛЕНД. (www.kingmarkoland.com)
Која е вашата задача во здружението?
Мојата задача е да го раководам проектот со една единствена цел, тоа да биде програма во која сите имаат можност во рамките на своето работење да остварат приход. Тоа е единствената варијанта на долгорочност на оваа програма.
Кои се другите членови на ова здружение?
Членка е секој кој себеси се наоѓа во оваа идеја, хотел, ресторан, туристичка агенција, изработувачи на сувениири, општини, невладини организации, медиуми, поединци. Кај нас членот има само една обврска, да ја промовира нашата програма низ сопствено успешно работење.
Одвојте некои од активностите поврзани со храната, што е најинтересно што би можеле да издвоите од досегашните активности?
Со текот на годините успеавме да одржиме долгорочен настан наречен Крале и Марко вечера, денови на рамонда, денови на пеперутката и сл. во кој и храната ја моделираме во однос на настанот. Крале и Марко вечера (една таква вечер одеше и со директен пренос на МТВ) е настан во кој се промовираат македонски јадења кои не содржат состојки кои во тоа време не постоеле, како што се пченка, пиперка, патлиџан, компир, тиква и сл. Храна која потекнува од Америчкиот континент и во тоа време ја немало на нашите простори. Кога ќе се вратите во тоа време ќе видите дека многу од денешната храна од тој период се задржала во изворна форма како македонски специјалитети до ден денес. Како што се на пример чомлек, лапа, ширден, чорба од риба или фазан и сл.
Дали вие сакате да готвите и дали се тоа токму такви стари зачувани рецепти?
Да сакам да готвам и да испробувам рецепти. Сите што ме познаваат знаат колку сум посветена на храната. Кај нас дома имаме една зимска атракција. Натпревар во што повеќе изедени кнедли од компир со суви сливи. Едвај чекам да дојде зимата.
Наскоро почнува уште еден настан во ваша организација, тоа е недела на тиквата. Кажете ни нешто повеќе за овој настан?
Нашиот пријател и член на КИНГМАРКОЛАНД продукција РИБАРСКА ВИСТИНА, која вооедно е и продуцент на нашиот серијал НЕПОЗНАТА МАКЕДОНИЈА со кого ја подготвуваме емисијата КРАТОВО ГАСТРОНОМСКА ОАЗА во која ќе го претставиме Кратово од еден друг агол, богаство на сочувана природна храна, од неодамна во ЃОРЧЕ ПЕТРОВ отвори ресторан КАЈ РИБАРОТ со основна цел можност на промовирање на храна од риба. Тука во ресторанот правевме веќе неколку промоции на настани врзани со риба. Гирици и домашна ракија, по повод денот кога на Венера еден дел доби име Охридско езеро. Гирици и пиво Крале Марко за денот на загинувањето на Волкашин на Маричка битка. И еве се подготвуваме за Недела на тиквата со гирици, пиво од тиква и печена тиква, со намера да промовираме едно специфично пиво за кое малку се знае кај нас. Настанот е се уште во подготовка и наскоро ќе се знае терминот.
Што подразбирате под македонска национална храна и што вие препорачувате како таква храна?
На нашата страница има еден интересен текст за македонската храна на која ние започнуваме од лебот и трагите најдени за тоа во локалитетот Говрлево до одредени имиња кои го носат коренот на македонското име како што е магданосот кој во одредени региони се уште го викаат македон.
Значи нашата програма е доста посветена на храната и гледаме голема шанса во приклучувањето на гастро туризмот, како шанса за една поинаква понуда која е во нагорна линија во светот.
Во рамките на Денови на Крале Марко голем дел од програмата е посветен на македонската храна. Со здружението МУДРИЈАДА од Србија учествуваме во промовирање на јадења од бели бубрези кои два-три пати беа одржани во Скопје и Куклици. Како дел од таа успешна соработка ќе напоменам дека во нивната книга за јадења од бели бубрези три рецепти се од Македонија, од Кратовскиот крај. Идната година подготвуваме промовирање на сирење, колбаси и друга храна од магаре. Во рамките на нашата програма во изработка е веб страница Календар 365 во кој едната рубрика е 365 рецепти на македонски јадења, по едно за секој ден.
И за крај се што како храна останува при манифестациите даруваме.
Вашето омилено македонско јадење?
Искрено јас лично имам посебен однос кон храната. Јадам многу малце и сакам кога конзумирам храна да не мешам вкусови, но уживам кога имам гости или пријатели да ја покажам мојата кулинарска умешност во која доминира македонска храна.
Задоволство ми се сирењето и кашкавалот, чорба од риба или фазан, изнутрици како што се ширден, дроб сарма, сарми со лист од рен, овошни салати и секогаш сум подготвена да испробам нешто ново. На социјалните мрежи што ги водам, посебно фејсбук, имам страница за македонски јадења кои редовно ги испробувам со моите пријатели.
Кое е најинтересното/најнеобично јадење што се подготвувало кај нас а е можеби заборавено?
За мене тоа е жетварска чорба, за прв пат ја пробав во Кочани пред пед шест години, нешто што одушевува и многу годи во лето. Многу стар рецепт, особено добредојден е во период кога се големи горештини. Кога се одело на жетва ова било главно јадење со топло домашно лебче.
Во сад се става лукот и солта и се толче. Се додава краставицата исечена на коцки. Налејте ладна од фрижидер вода. Додајте го оцетот, промешајте и чорбата веќе е спремна.
Додека работев како советник за туризам во ЈАСЕН посебно ја засакав чорбата од фазан и гулашот од дива коза кои се вистинска бум понуда за туристите кои ги посетуваат овие предели.
Супа од фазан:
Фазанот се става да се вари , се додава целерот, пашканатот, морковот и вегетата. Откако ќе се свари фазанот се вади од тенџерето, и се двои од коска, се сецка на ситни парчиња месото, целерот, пашканатот, морковот и се става во посебен сад, водата се прецедува и се полива во садот со месото, се додава сок од лимон, бибер магдонос ситно сецкан.
Гулаш од дива коза
Месото се сецка на ситни парчиња и се става во пајс (во сад со кромид, лорберов лист, бибер во зрно, оригано, магдонос и бело вино) да престои 24 часа. Откако ќе престои во пајсот со истата вода се вари половина час, се двои месото во чист сад и чиста вода во кој се става кромид и сол и се вари се додека не се свари. Кромидот се сецка и се пржи се додека убаво не омекне, вареното месо се запржува во зејтин , потоа се става во претходно испржениот кромид и заедно се пржи на тивок оган, се додава ситно сецкан сув пипер, морков, домати, буковка лута, бибер во зрно, бело вино повремено се промешува се така се вари уште еден час, се трга од оган и гулашот е спремен за сервирање.
Кнедли со суви сливи
Компирот излупете го, измијте и ставете нека се вари. Кога ќе биде варен тргнете исцедете и згмечете како за пире, тргнете на страна нека се лади. Кога е убаво изладено пирето во него додадете го брашното, јајцето и малку сол. Убаво да биде меко и глатко. Сливите измијте ги и извадете им ги семките, се става една слива во една кнедла. Во тенџере ставете вода и почекајте да зоврие. Откако ќе почне да врие во неа спуштајте ги кнедлите (готови се кога ќе испливаат на површина). Кога ќе испливаат вадете на страна нека се цедат, ставајте по малку кнедли за да можат слободно да се вртат во варењето. Во тавче ставете презли и додадете го шеќерот. Кнедлите валкајте ги во оваа смеса.
