Колку е убаво да се има пријателка каква што е нашата Маре Јаневска! Да не ви образложувам зошто е се убаво да се има ваква пријателка, има навистина многу причини, но ќе се задржам на најповршната – луѓе, знаете ли вие што се умее да направи?!
Уф, навистина е виртуоз кога станува збор за храна, а ако сте мераклии за благо – ќе ве шекне.
Мислам дека кога го пробав ова колаче, ми се случи токму тоа. Наеднаш престанав да ги слушам што зборуваат тие двете – Маре и нашата драга Вања (Тодоровска), имав чувство дека лебдам и единствено на што мислев во тој момент, беше вкусот на колачето во мојата уста.
А Маре како Маре, го направила онака, без мерка, по чувство.
Искрено, уште истиот ден, во консултација со неа, пробав да го направам и самата.
И го направив. Малку е поинакво – го гризнав, и немав чувство дека лебдам. Вкусно е…и толку!
Еве како „отприлика“ се прави:
Состојки:
Мелени кекси
Путер и евентуално малку млеко за да можете да обликувате кора како за чизкејк.
Црн фил:
2 црни чоколади
500 г. какао-крем (еурокрем)
потпечени и исечкани ореви и лешници
Бел фил:
2 бели чоколади
1 крем сирење
путер
Карамел:
шеќер во прав
малку млеко
путер
Приготвување:
Обликувајте кора од кексите и путерот и евентуално малку млеко за да ја обликувате.
Потоа стопете ги црните чоколади и додадете го еурокремот и потпечените јатки.
Оставете го настрана.
За белиот фил растопете ги белите чоколади и оставете ја смесата да се олади, а потоа додадете и путер и крем сирење на собна температура. Измешајте се со миксер.
За карамелот стопете го шеќерот во прав па додадете малку млеко и путер и варете додека не се згусне, но не претерувајте како мене – треба да остане течен како сос за да можете да го прелеете одозгора.
Но прво ставете го црниот фил врз кората од кекси и оставете да се здрви во фрижидер. Потоа извадете го од фрижидер и ставете го белиот фил. На крајот прелијте го карамелот.
Ставете го колачот во фрижидер и не го пипајте до следниот ден. Пред сечење извадете го од фрижидер за да се опушти малку за да може да го сечете на мали коцки. Прилично е благ, па ќе ви потрае. Особено ако не е баш како оној на Маре.
