Италијанскиот шеф со Мишелин ѕвезда, Џорџо Дијана доаѓа во Македонија, а во Охрид честа да ги пробаат неговите специјалитети ќе им припадне на сите кои ќе бидат дел од специјалната вечера во ресторанот на Су Хотел во сабота, 13. октомври. Ова е дел манифестацијата Taste Ohrid 2018, кој ќе се одржи од 12 до 14 октомври на повеќе локации низ Охрид.
Меѓу другите гостински готвачи кои ќе ја збогатат гастрономската понуда се и српскиот шеф Ѓорѓе Крстиќ, романскиот шеф Раду Зарнеску и македонскиот шеф Дејан Карапеев. Како дел од програмата е предвидена обука на локалните готвачи на Факултетот за Туризам и Угостителство, гала вечера и презентација и дегустација на разни локални и морски специјалитети за посетителите на фестивалот.
Покрај светските специјалитети кои ќе бидат понудени на дегустација за посетителите на Taste Ohrid, интересна за посетителите ќе биде и понудата на реинвентирани македонски рецепти. Имено, користејќи локални производи и традиционални македонски специјалитети, локалните шефови Давид Санџакоски и Никола Ангелкоски, заедно со светските и локалните готвачи кои ќе присуствуваат на обуката одржана на Факултетот за туризам и менаџмент, ќе приготват нови вкусови за бесплатна дегустација на „After Work Sunset Party”, со почеток од 17 часот пред Су Хотел во петок, на 12. октомври.
Покрај гастрономската понуда на фестивалот, ќе бидат понудени содржини и за љубителите на адреналинските спортови и планинскиот туризам, па во рамките на спортскиот дел од фестивалот посетителите ќе можат да уживаат во прекрасните предели на националниот парк Галичица и Охридското Езеро преку организираните тури за велосипедизам.
Секако, покрај гастрономското уживање и спортските активности во текот на денот и попладневните часови, вечерните часови се резервирани за добрата забава и дружење, а за таа цел ќе бидат организирани забави низ повеќе локални барови и ноќни клубови во Охрид.
Настанот „Taste Ohrid 2018“ е поддржан од Општина Охрид, ЕДЕН – туристички кластер за југо-западна Македонија и Швајцарската програма за зголемување на пазарната вработливост.
