Последниот ден на Тера Мадре, ден за шопинг на се што сте стасале да пробате и да не пробате, како обид да понесете со себе барем некое делче од сите вкусови и мириси што сте ги впиле на најголемиот саем за храна на светот во Торино.
Пекорино, пармезан, најубавите маслинови масла, шери домати, лазањи, пиви, тестенини со мастило од сипа и други „перверзии“, пршути, мортадели, колбаси со тартуфи, со триста марифети и состојки кои во овие комбинации никогаш не сте се ни сетиле да ги пробате. И сето тоа сконцентрирано на еден голем простор – во Лингото. Италијански, африкански, азијски, мексикански, индиски, од сите континенти и од сите страни на светот…сите заедно ги разменуваат меѓу себе најдобрите производи од своите земји и со насмевка се збогуваат до некое следно видување, можеби повторно тука, на Тера Мадре 2020.
И, за крај, пораката испратена од тука: Храна наместо бомби!
