Од 10 до 14 октомври Охрид ќе биде домаќин на четвртиот Интернационален Гастрономски Натпревар – ГастроМак 2019. Настанот ќе се случува во охридскиот хотел Нова Ривиера. Ова денес го соопштија од Асоцијацијата на готвачи и шефови на кујни од Македонија – ГастроМак.
Оттаму најавуваат дека на големиот кулинарски настан ќе присуствуваат околу четиристотини учесници – натпреварувачи, судии и почесни гости и гастрономски амбасадори од многу земји и, практично, ќе го донесат светскиот гастрономски „крем“ кај нас. Натпреварот ќе се одвива под мотото „Don’t Worry, Be Ohrid!”, а логистички е поддржан од WACS – World Association of Chefs Societies, Светската организација на шефови на кујни, асоцијација која ги обединува националните кулинарски здруженија од преку 150 држави во светот.
„Со оглед на одличните одгласи во пошироката јавност за нашите проекти од минатите години, почестени сме да ве информираме дека оваа година манифестацијата ќе ја поткренеме на уште повисоко рамниште! Светската гастрономска јавност со месеци зборуваше во суперлативи за минатогодишниот настан, такашто и годинава, во Охрид, мораме да го одржиме и да го надминеме заслуженото реноме. Со домаќините – Општината Охрид и хотелот Нова Ривиера – сигурни сме дека и оваа година ќе направиме настан за долго паметење!, изјави претседателката на ГастроМак.
ГастроМак 2019 ќе биде годишна натпреварувачка ревија на шефови на кујни од глобални размери, а нашата земја ќе ја има честа поворно да угости великани во светската гастрономија, познати шефови и натпреварувачи од неколку континенти.
„Овој настан има за цел да ја поттикне и унапреди гастрономската понуда и да ги промовира техниките за подготовка на храна, кои ги применуваат најпознатите светски готвачи. Ние како локална самоуправа и јас како градоначалник, секогаш ќе бидеме подготвени за поддршка на вакви настани, кои се во насока на промоција на Охрид како туристички центар и настани кои придонесуваат за збогатување на туристичката понуда на нашиот град надвор од шпицот на летната туристичка сезона”, изјави градоначалникот на Општина Охрид, Константин Георгиески.
Одговорните во хотелот Нова Ривиера се убедени дека ќе бидат и повеќе од добри домаќини на светската гастрономска елита.
„Ќе направивме сè што е можно и неможно организацијата и натпреварувањето на ГастроМак 2019 да помине во најдобар ред, и сите да си заминат со позитивни впечатоци и да посакаат повторно да се вратат”, вели директор на хотелот Јане Тодороски.
