Таа е секогаш таму кадешто се најубавите торти, а нејзиното име е синоним за „ангелчињата“, хуманитарната организација која ја основаше пред цели 16 години за да им помага на оние на кои им е тоа потребно преку организирањето на најслатките хуманитарни манифестации, тортијадите „Слатка мистерија“ и „Интерскопкејкс“. За Снежана Ангеловска слаткарството е најубавата професија, особено чоколадото и артистиката и својата професија ја работи со љубов.
Преку својата ФБ страна Sweet Bakery ги пласира своите слатки и уникатни креации, слатки и торти кои заедно со својот тим ги изработува во работиницата ‘Sweet’, најпрепознатлива по долгометарските торти.
Најдобро од се е тоа што занаетот се труди да го сподели со секој кој е заинтересиран за оваа професија. Со нас го сподели рецептот за својата посна пита со сливи и смокви.
Посна пита со сливи и смокви
За тестото:
360 г брашно
250 г посен маргарин
50 мл вода
Кора од лимон
Прстофат сол
За филот:
100 г карамелизиран шеќер
500 г модри сливи (замрзнати, ако имате, ако не, можете да употребите и друго замрзнато овошје по ваш избор)
100 г мелени суви смокви
10 г ванилин шеќер
Приготвување:
Се замесува тесто од состојките, се обликува во топче и се остава во фрижидер еден час.
За филот се става во тавче на рингла шеќер за да се карамелизира. Се додаваат 500 г модри сливи, се мешаат и се додаваат 100 г мелени суви смокви кои ги врзуваат сливите да не се воденасти и даваат хомогена маса. Се остава неколку минути да се спојат состојките и на крај се додава 10 г ванилин шеќер.
Тестото се дели на два дела и се расукува кора за тавче (24 цм).
Се става одозгора филот па се покрива со другата половина од тестото. Се пече на 200° околу 10-15 минути, во зависност од моќноста на рерната.
Кога ќе зарумени кората одозгора се вади од фурната и се остава да се олади па се поросува со шеќер во прав.
