Владимир Барџиќ почнал да работи како готвач во Будва пред единаесет години кадешто своето знаење несебично му го пренелe неговите ментори од Грција и Италија и посебно менторот од Хрватска, Борис Урем.
– Тоа се врвни готвачи, кои те обучуваат се што знаат. Мојот ментор ме учеше како да ја готвам африканската кујна. На почетокот и мене ми беше невообичаено, но за кратко време пристигна и на овие простори. Месото од крокодил, зебра, кенгур пристигна и на Балканот и може да се набави и да се нарача. Предност имав што веќе бев подготвен за оваа новина -раскажува, Барџиќ.
Готвел се што може да се зготви од овие животни.
-Опашот од крокодил или филе е доста квалитетно парче, зебрата се готви како коњско месо и мора да се свари и добро оди со француска, руска салата, појаснува кумановецот.
Покрај африканска и индонезиска кујна готви секаква храна, различни рецепти што ги освојуваат сите љубители на добро подготвена храна која се базира на зачински билки од регионот во кој се наоѓа.
Не можете да зготвите убаво ако храната не потекнува од тој регион. Мене така ме научија менторите, мора прво да се прошета местото, да се видат локалните пазари, што е квалитетно, кои се карактеристиките на тој регион, каде е најубавото јагнешко, кои се најароматичните билки, се што може да се искористи од локалните продукти. Не користам презла, ниту суви зачини, туку свежи, од суви користам само сол и бибер, вели Барџиќ.
Негови гости во Црна Гора во познатиот хотел биле сите од естрадата од соседството, глумци, пејачи, спортисти. Во Хрватска има гости од целиот свет, раскажува Барџиќ, покрај пејачите и актерите како Раде Шербеџија, гост му бил и поранешен премиер на таа држава, поголем дел од фудбалската репрезентација, меѓу нив, Шиме Врсаљко, Лука Модриќ, Матео Ковачиќ.
-Сепак, најчесто гости се странци, кои доаѓаат со јахти во Хрватска. Бараат различно од едноставни јадења, многу скромни, некои специјалитети кои се карактеристични за балканската, пред се хрватската кујна, па се до позлатен јунешки рамстек, вели Барџиќ.
Тој обожува да готви морска храна, ракови, шкампи, спринг ролни со три вида сирење, замотани во кори од ориз.
За него најголем предизвик е да ја готви македонската традиционална кујна.
-Токму разновидноста и од друга страна, едноставноста на состојките на нашата кујна е она што не карактеризира надвор. Често се случува некои странци кога ќе слушнат дека шефот е од Македонија, да побараат да подготвам гравче на тавче или турлитава и мора да признам дека секогаш имам блага трема кога готвам наши јадења, вели Барџиќ.
За македонските продукти вели дека се прекрасни, оние кои се одгледуваат во селата, од домашни производители.
Позната му е молекуларната гастрономија. Детално објаснува како се прави пена од морков и останатите корени, лажен кавијар, лажен чипс направен од ципа. Ги користи за декорација.
На неговото мени кое го планира за рестораните на островот Хвар ќе преовладува морската храна, карактеристична за островот, со едноставни но здрави салати.
Преземено од МИА
