На петтиот интернационален натпревар на готвачи и фестивал на гастрономија БХ Дукат – Вкусот на Херцеговина“ кој се одржа во Хотел Парк во Широки Брег на 24-ти и 25-ти ноември, а беа пријавени повеќе од 120 врвни мајстори од седум земји, македонските готвачи освоија 4 златни, 5 сребрени и 1 бронзен медал, како и победа во финалето и освојување на купот.
Готвачите од Словенија, Хрватска, Србија, Македонија, Црна Гора, Романија и земјата домаќин Босна и Херцеговина ја покажаа својата умешност во слаткарство (артистика и торти), подготвување на национално јадење на модерен начин, подготвување на јадења од риба и ресторански десерт, а финалистите за медалите се натпреваруваа подготвувајќи од зададените намирници предјадење, главно јадење и десерт.
Комплетниот натпревар и стручноста, како и одлуката за победниците го донесе интернационалното стручно жири, составено од 17 водечки европски кулинарски авторитети меѓу кои и Белгиецот по потекло од Македонија шеф Марк Де Јонг. Како почесен претседател на жирито во работата на фестивалот учествуваше и господинот Стево Карапанџа. Тој е доајен на светската гастрономска сцена, на пошироката публика познат како водител на исклучително популарната ТВ емисија „Малите тајни на големите мајстори на кујната“. Посебен куриозитет на годинешниот фестивал беше и тоа што на него се натпреваруваа и младите готвачки таленти, учесници од средните угостителски училишта од регионот.
Македонските бои со новите специјално дизајнирани и везени облеки ги бранеше тимот од врвни готвачи од здружението MACEDONIAN MULTIETNIC CULINARY CHEF’s – MMCC предводени од: претседателот Шеф Марк Де Јонг, потпретседателите Шеф Никола Мишковски, Шеф Зоран Мајновски, потоа Шеф Дејан Карапеев, Шеф Бобан Симоновски, Шеф Зоран Андонов, и менаџерот Асан Даутович.
