Ако ви е полесно навечер во време кога сите нормални веќе мијат заби, се тушираат или се подготвуваат за утрешниот работен ден, да замесите кифли и да ги чекате да нараснат и да се испечат, наместо да одите со време да си купите леб за отсабајле, мора да не ви се сите овци на број!
Како и да е, за овие големи вкусни кифли, ви требаат:
1 килограм брашно (можете да измешате бело и пченкарно)
500 мл млеко
100 мл стопен путер
1 лажичка сол
2 лажички шеќер
1 сув квасец
1 лажичка сода бикарбона.
По желба: 1 јајце за премачкување, малку сусам за поросување.
Приготвување:
Замесете тесто од сите состојки (млекото нека биде млако, а путерот стопен па малку подизладен) и оставете го тестото покриено со чиста крпа да нарасне 20 минути.
Потоа земајте по малку од тестото, правете топчиња и развлекувајте ги во мали кори кои потоа ќе ги завиткате во форма на кифли.
Премачкајте ги со изматено јајце и поросете ги со сусам и печете ги околу 20 минути во загреана рерна на 200 степени.
Покријте ги со крпа и одете легнете си!
