Јагодите се многу вкусни, но се покажале и како многу корисни. Пред се, познати се како ефикасен лек за анемија, зајакнување на крвта, но исто така го намалуваат и ризикот од појава на срцеви болести. Содржат големо количество витамин Ц и железо, па само 100 грама јагоди ја покриваат потребната дневна доза за витамин Ц.
Освен ова, новата студија на италијанските научници покажала ветувачки резултати и во борбата против рак на дојка. Научниците докажале дека екстракт од јагоди кај лабораториски глувци го спречува ширењето на карцином.
Авторите на студијата истакнуваат дека она што го потврдиле на глувци, не мора нужно да важи и за луѓето. Маурицио Батино, автор на студијата, вели дека без сомнеж овие резултати се важни за разбирање на потенцијалните ефекти од јагодите на карциномот на дојка и да се потврди кои молекуларни механизми се вклучени.
Тој истакнува и дека е потребно резултатите од студијата да бидат споредени со други клинички и епидемиолошки студии за конечно да се потврди дали ефектите се во целост исти и кај луѓе.
Пет недели откако на глувците им е даден екстрактот од јагоди, научниците можеле веќе да го отстранат туморот, потврдувајќи дека овој екстракт спречува ширење на канцерогени клетки во околното здраво ткиво. Батино вели и дека забележале одредено намалување на тежината и волуменот на туморот.
Иако во принцип, секое овошје е добро за здравјето, јагодите во споредба со другото овошје имаат голема количина на фолна киселина и витамин Ц. Постојат разлики помеѓу одредени видови на јагоди, велат авторите.
Некои имаат појака концентрација на фенол, за што зборуваа и претходните истражувања, и имаат извонредни здравствени ефекти. Во оваа студија се користени јагоди од видот алба, произведени во Италија.
