Деновиве се јадат варени јајца. И веројатно имате барем уште 5-6 во фрижидерот кои конечно, денеска, мора да се изедат.
За да не ги јадете онака, само со сол, зашто сигурно веќе се презаситивте од нив, а и Мимоза салатата ви е веќе преку глава, еве една многу поинтересна варијанта за да ги дојадете сите останати јајца од Велигден, и тоа во сласт.
Состојки:
Варени јајца
1 црвен кромид
1 голем домат
1 лажичка кумин
1 лажичка чили во прав
4 чешниња лук, ситно исчекани
1 лажица ѓумбир
1 лажичка сечкан коријандер
Билно масло
Прстофат сол
Прстофат црн пипер
Приготвување:
Во длабок сад или во тава загрејте го маслото и пропржете ги варените јајца додека не заруменат.
Во истиот сад додадете уште малку масло и ставете ѓумбир, кумин и лук и загревајте неколку минути. Додадете го кромидот, сол и црн пипер и пржете додека кромидот целосно не омекне. Потоа ставете го доматот и варете уште 1-2 минути.
Состојките тргнете ги од оган и измешајте ги со миксер или во блендер. Потоа вратете ги во садот и повторно на оган, додадете го коријандерот и чилито и кратко проварете.
Ставете ги јајцата и чаша вода и оставете сѐ да се вари 2-3 минути. Проверете дали треба да се зачини уште малку и тргнете од оган.
Послужете со топло лепче.
