Васил Пеевски почнал да се занимава со работата на бармен пред четири години кога се запишал на курс во училиштето за бармени „Револушн“ во Скопје. По завршената обука и добиениот сертификат, веројатно како најдобар во групата, добил работа како инструктор. Неговата посветеност и талент биле препознаени и на светскиот натпревар организиран од „Мери Бризард“, во Бордо, Франција, кадешто Васил го освоил четвртото место. На десетото првенство што се одржа вчера во хотел „Мериот“ во Скопје тој беше прогласен за најдобар бармен и ќе ја претставува Македонија на светското првенство во Копенхаген.
Иако студирал дизајн на мебел и ентериер, откако почнал да се занимава со оваа професија, сфатил дека таа е она вистинското за него и ги прекинал студиите. Во моментов работи во коктел бар Speakeasy во Скопје.
Како стаса на светскиот натпревар во Бордо и што значеше за тебе четвртото место што го освои таму?
На натпреварот во Бордо бев во ноември минатата година откако победив на државниот натпревар организиран од страна на „Мери Бризард“. Станува збор за спонзорски натпревар, на кој го освоив четвртото место во конкуренција од 35 земји. Со оглед на тоа што моите главни конкуренти беа претставниците на Германија, Канада и Данска и со оглед на тоа што како и секаде така и тука има многу политика, иако квалификациите ги завршив како втор, а исто и втората рунда, сепак се знаеше дека нема да бидам прв, втор или трет, туку четврти, што е сепак одличен успех за еден бармен на светски ранг. На натпреварот имаше повеќе предизвици, имавме свој авторски коктел, а имавме и black box challeng, односно, сите добивме црна кутија со пијалоци од кој за 20 минути требаше да искреирамe коктел.
Колку време се занимаваш со оваа професија и како воопшто започна се?
Јас студирав дизајн на мебел и ентериер и ја почнав целата приказна како ново хоби, како работен ангажман за време на викендите додека студирам, но како што навлегував во цела оваа приказна, сфатив дека е тоа она што сакам да го правам. Не те пушта самата професија, бидејќи да се биде бармен е начин на живот, не можеш да одиш 8 часа на работа и после да заврши приказната, тоа е цела филозофија на живот, а јас планирам да биде и моја животна професија.
Пред 4 години го завршив курсот за бармени и добив сертификат признат од интернационалната федерација на бармени и сега сум инструктор во истото училиште. Од пред две години почнав сериозно да се занимавам со оваа работа и сега се занимавам само со коктели и работам во коктел барот Speakeasy во Скопје.
Имаш ли некои интересни случки со гостите откако си професионален бармен?
Некој вид обврска или задача на барменот е да процени каков пијалок сака гостинот на барот, да му предложи, да го анимира и слично, но кај нас гостите имаат бариера и не дозволуваат барменот да направи нешто за нив по свој избор. Една интересна случка беше кога неодамна еден гостин цела вечер негодуваше за се што ќе направев, тој знаеше многу, јас ништо, не пиеше коктели, бидејќи пиел само коктели што тој ги знае и се знаеше подобро од мене. На крајот некако се согласи и дозволи да му направам коктел, а кога го проба, се воодушеви. За жал, кај нас не се пијат многу коктели и малку се оние што ги консумираат и што е уште полошо, консумираат коктели со лош квалитет. Работата е застаната на ниво од пред 20-30 години, бармените не се едуцираат доволно, не сакаат да напредуваат во својата работа и затоа не може да ги обвиниме гостите.
Што ви бараат најчесто?
Во нашето мени имаме исклучиво наши, авторски коктели и некои од оние класичните коктели од пред многу години, но доста се пијат токму нашите.
Што мислиш за онаа легендарна реченица на Џејмс Бонд, „shaken, not stirred“? Навистина ли е коктелот подобар кога е протресен?
Тоа е работа на вкус, но според мене, коктелите се подобри во стир верзија. Значи, спротивно на Џејмс Бонд, сметам дека кога е коктелот протресен, се нарушува структурата на коктелот, се разводенува малку повеќе и ја нема онаа структура која јас сакам да ја има, да е малку поостар, помажествен, да го има карактерот, а тоа се губи со шејк верзијата бидејќи на тој начин навлегува повеќе воздух во самиот коктел и малку повеќе се разредува.
