Јајцата што ви останаа од Велигден можете да ги искористите во најразлични здрави и вкусни рецепти.
Пилешка салата
Состојки:
зелена салата
300 г варено бело месо
2 тврдо варени јајца
За преливот:
2 чаши јогурт
1 лажица сенф
Половина лажица сув зачин од билки
2 лажици мајонез
Приготвување:
Добро измешајте ги состојките за преливот. Измијте ги листовите зелена салата и исечкајте ги во сад за салата. Одозгора ставете сечкано бело месо и јајцата исечени на тркалца. Прелијте ја салатата со подготвениот прелив.
Салата со туна
Состојки:
1 варено јајце
1 домат
1 краставица
1 пиперка
1 конзерва туна
црни маслинки
1 кромид
1 главичка зелена салата
Малку маслиново масло
Сок од лимон, сол, црн пипер.
Приготвување:
Исечете ги јајцето и доматот на тркалца, краставицата на коцки, пиперката на ленти, а кромидот на прстени. Исечкајте ја зелената салата. Измешајте го зеленчукот, зачинете го со маслиново масло, сок од лимон, сол и црн пипер и додадете ги маслинките.
Тортилји со фил од јајца
Состојки:
Тортилји
4 тврдо варени јајца
150 г варен компир
160 г мајонез
300 г мешан варен зеленчук
70 г кромид
30 мл оцет
Павлака, чили сос, сол, црн пипер
Приготвување:
Прво подгответе го филот. Исечете ги тврдо варените јајца и компирите на помали парчиња и измешајте ги со ситно исечен кромид и варен зеленчук. Измешајте го мајонезот со оцет, а потоа додадете го во јајцата и зеленчукот, посолете и промешајте повторно.
Загрејте ги тортилјите во тава, а потоа наполнете ги, ставете ги на чинија и прелијте ги со чили сос и павлака.
Туна паста
Една од познатите и вкусни комбинации е туната измешана со јајца. Со овие две состојки можете да направите мешавина што можете да ја користите во сендвичи и салати. Потребно ви е само ситно да ги исечкате јајцата, да ја додадете згмечената туна и да зачините со омилените зачини. За побогат вкус, додадете маслиново масло или сенф.
Медитеранска салата
Имајќи предвид дека салатите се едно од нашите омилени јадења, решивме да споделиме уште еден рецепт за салата. Станува збор за медитеранска салата. За овој оброк ви се потребни следниве состојки:
зелена салата
фета сирење
маслинки
домат
јајца
туна
маслиново масло
оригано
Полнети варени јајца
Полнетите варени јајца се неизбежно јадење на трпезата по Велигден. Ние исто така ќе ги направиме, но на малку поинаков, поздрав начин.
Состојки:
3 тврдо варени јајца, исечени на половина
1 поголемо авокадо
2 лажици сок од лимон
Малку магдонос
Прстофат лук во прав
Сол, црн пипер
Исечкан млад кромид
Приготвување:
Извадете ги жолчките од јајцата во посебен сад.
Додадете го авокадото и другите состојки и згмечете сè со вилушка.
Наполнете ги јајцата со смесата и уживајте.
Фото: Unsplash
