Доброто рижото е гастрономска уметност по која се разликуваат добрите готвачи од лошите. Со само неколку состојки се претвора во јадење достојно за гозба. Но за да биде рижотото кремаво, полно со мириси и вкусови, но и натаму да ја задржи структурата, потребно е малку време, љубов и внимание.
Еве каде е можно да грешите.
Користите погрешен ориз
Ако сакате да направите одлично рижото, започнете со вистинскиот избор на ориз. Без квалитетен ориз нема добро рижото. Добар избор на ориз се арборио, карнероли или виалоне нано затоа што содржат поголем процент на скроб кој се ослободува при готвењето, па оризот станува покремав. Виалоне нано (во превод: џуџе) е италијанска сорта на ориз типична за регионор Венето. Има фино ситно зрно и извонредно впива течност заради што е добро за рижото.
Не употребувате кромид
Загрејте го маслиновото масло – по желба можете да додадете и малку путер па пропржете ситно сечкан кромид. Некои готвачи додаваат и лук, а во оваа фаза смеат да се додадат и шпароги и целер.
Не го пропржувате оризот
По неколку минути се додава оризот „на суво“. Оризот пржете го мешајќи додека секое зрно не се намрси, неколку минути.
Премалку или премногу варење
Кај оризот е многу важно зрната да останат ал денте, надворешниот раб да биде мек, а средината да се почувствува под забите. За да се постигне тоа, зависно од одбраниот ориз, тој се вари 15, 17, 18 или максимум 20 минути.
Грешки со супата
Во текот на варењето рижотото треба да се подлева со топла супа, па неговиот вкус зависи од квалитетот на супата.
Брзате
Оризот цело време се подлева, а со постојано мешање се ослободува скроб. Количината на супата по додавањето не би требало да преминува еден прст над оризот.
Заборавате на путерот
Две минути пред крајот на варењето набрзина помешајте малку путер и по желба, пармезан. Таа техника се вика мантекирање. Додавањето на павлака италијанските шефови не го толерираат.
Фото: Pixabey
