Шеф Благоја Велковски на гастрономскиот натпревар Best cook fest – Podillia во Украина освои златен медал за риба и бронзен медал за модерна кујна и за ова искуство вели: „Конкуренцијата беше голема и ги одмеривме силите со големите светски гастрономски мајстори, но освен што освоив награди, го збогатив и моето искуство преку соработката со колегите и со судиите. Некои од нивните совети ги искористив во текот на натпреварот“.
Шеф Игор Каспер Атанасов пак, освои сребрен и бронзен медал и тоа во подготвување јадења од јагнешко месо и во категоријата пилешко месо.
Освен како натпреварувач, Игор заедно со Весна Тодоровска- Алачковска имаше и многу одговорна задача како меѓународен судија во 4 категории.
„Ова беше ново и преубаво искуство за мене. Работев како судија на вкусови, а ја оценував и работата во боксовите. Натпреварувачите беа одлични, а за мене беше голема чест да сум рамо до рамо со врвните судии од Турција, Азербејџан, Хрватска, Словенија, Белорусија, Русија, Монголија и Молдавија“, раскажува Игор.
