Многу луѓе дури и не знаат дека се нетолерантни на лактоза. Ја има во многу намирници како млекото, сирењето, јогуртот, чоколадото, но и во многу други.
Симптомите не се толку силни како кај алергиите, кога животот може да биде загрозен, па луѓето често не сакаат да се откажат од овие намирници додека телото страда. Се проценува дека речиси 65% од луѓето имаат недостаток на ензимот лактаза, што им го отежнува варењето на млечниот шеќер во поголема или помала мера.
Во тој случај станува збор за нетолеранција на лактоза, односно за луѓе чиј организам е чувствителен на лактоза. Доколку се сомневате, еве неколку непријатни симптоми кои може да бидат показател дека и кај вас станува збор за нетолеранција на лактоза.
Надуеност
Еден од типичните симптоми на нетолеранција на лактоза е надуеноста. Јаглерод диоксидот и метанот се собираат во цревата и се одговорни за тешката надуеност.
Болки во стомакот
Ако ве мачат гасови и надуеност, секако дека не можете да си олесните себеси во секое време. На пример, ако сте во друштво. Сепак, тоа има свои последици: кога гасовите се задржуваат, цревата стануваат напнати и предизвикуваат болка и чудни звуци.
Грчеви
Еден од симптомите на нетолеранција на лактоза се дефинитивно грчеви во стомакот.
Дијареја
Телото не е во состојба да ја разгради лактозата во тенкото црево, па тоа се случува во дебелото црево. Ова, меѓу другото, произведува млечна киселина, која предизвикува акумулација на вода во дигестивниот тракт, а тоа води до дијареја.
Запек
Можеби звучи контрадикторно, но со текот на времето, нетолеранцијата на лактоза може да доведе до запек. Ова може да се случи кога заради нетолеранција во цревата ќе настане метан. Цревата работат побавно заради гасовите и доаѓа до непријатен запек.
Гадење и повраќање
Поради неспособноста на телото да ја разгради лактозата, дигестивниот систем е исклучително под стрес, предизвикувајќи гадење, а во тешки случаи и повраќање.
Главоболка и вртоглавица
Атипични симптоми на нетолеранција на лактоза се главоболка и вртоглавица. Не е целосно јасно зошто се појавуваат овие симптоми, но можно е лактозата во дебелото црево да произведува супстанции кои преку крвотокот стигнуваат до целото тело и на тој начин предизвикуваат проблеми.
Фото: Unsplash
