Кога купувам свежа риба секогаш си мислам, денеска ќе имаме супер здрав ручек. А бидејќи сите дома сакаат риба, таа е најдобар избор за нашите семејни ручеци.
Иако планот ми беше да купам по една пастрмка за секого, кога видов дека нема помала од пола килограм, купив 4, па решив да си ги делиме по пола. А купувачот кој влезе по мене и онака налутено си замина од рибарницата откако им порача на продавачите да им пренесат на сопствениците на рибниците да ги прават рибите помали, некако ми го скрши меракот.
Јас сакам да си замислувам дека рибата е тукушто уловена па донесена рано наутро во рибарницата, а не од рибник, товена.
Така, реченицата на дечкото: „Кажете им да не ги прават толку големи, безобразни, епа не ви купувам“, ми дојде како шлаканица.
Како и да е, рибите си ги купив и ги спремив онака по мое, со маслиново масло, лимон, сол, црн пипер, малку лукче и неколку гранчиња свеж рузмарин. А како прилог, сечкан магдонос со маслиново масло, сол, сок од лимон и уште лукче.
Пастрмките се печеа пола час под фолија, а потоа уште 10-15 минути без неа… Товени или не, што и да значи тоа, рибата беше многу вкусна.
Сепак, кажете им да ги ‘прават’ помали…некако е поубаво кога секој си има свое парче, нели?
Фото: PS visualart
