Ѕвони алармот, но вие не станувате. Не можете да се концентрирате во текот на денот. Секогаш е така кога сме на диета.
„Самата помисла дека се лишуваме од најпримамливите деликатеси поради нашиот изглед го расипува расположението“, вели психодиетологот Силвана Далера. „Меѓутоа, понекогаш, станува збор за вистински симптом – пад на енергијата поради недостаток на јаглени хидрати“.
Мени – Ако сте на диета, прецртајте ги слатките: првичното чувство на задоволство брзо им отстапува место на гладот и грижата на совест. За да ги наполните батериите и да си ја вратите луцидноста, барем еднаш дневно изедете чинија тестенини или ориз, по можност интегрални. Тие постепено ја обновуваат енергијата и спречуваат нагло паѓање на шеќерот во крвта.
„Потребна ви е и храна богата со железо: ѝ помага на крвта да го разнесе кислородот низ телото“, вели Лаура Гарнероне, биолог и нутриционистка. „Ако не сакате месо, проверете дали секој ден имате порција свежи мешунки на трпезата“. На крај, не заборавајте да пиете вода – честопати е тоа доволно за да се потисне менталниот замор.
Монотоната исхрана, без оглед дали е поради диета или недостаток на време, волја и имагинација да се направи привлечна порција со храна, предизвикува тага и меланхолија.
„Истата работа се случува кога исхраната е сиромашна со состојки кои го одредуваат тонусот на расположението, во овој случај омега-3 и ниацин од групата Б витамини“, велат нутриционистите.
Обидете се вашето мени да биде разновидно. Јадете риба најмалку три пати неделно: содржи витамини од групата Б и омега-3. Тоа може да биде лосос, но може и сардини или скуша, кои се одлични кога се печени на скара, без маснотии. За аперитив – сок од домат или морков.
Исхраната со малку минерали како калциум и магнезиум предизвикува главоболки, надуеност и други заболувања. Но, прекумерната потрошувачка на обичен шеќер, особено на празен стомак, може да биде причина за мрзеливост и летаргија.
Мени – Избегнувајте сувомеснати производи што предизвикуваат задржување на водата и ограничете ја употребата на шеќер, џем и мед. „Чајот и кафето треба да се намалат: докажано е дека, покрај тоа што предизвикува раздразливост, кофеинот го намалува нивото на магнезиум во организмот“, велат експертите. „Јадете млечни производи за да обезбедите калциум и поросете ја салатата со ореви за да ги наполните резервите на магнезиум.
Ако сте напнати и нервозни, можеби сте навикнати да прескокнувате оброци, а ефикасноста ја црпите од пиењето кафе по кафе. „Ако пиете повеќе од шест кафиња на ден, веројатно ви недостасува и витаминот Е, кој ја регулира вознемиреноста.
Мени – Внимавајте на 3-те главни оброци, давајќи им предност на млечните производи, житарките и мешунките: тие се богати со триптофан, состојка која релаксира и ви помага да се чувствувате пријатно (ја има и во црното чоколадо).
„Со цел да го надополните недостатокот на витамин Е, наизменично консумирајте маслиново масло и масло од пченични никулци. Користете го сирово за да ги зачувате сите добри својства“, препорачуваат експертите.
Ако сте секогаш гладни. причината е веројатно затоа што го јадете она што не може да ви го наполни стомакот. „Многу е веројатно дека наместо намирници со растителни влакна и протеини, храна што навистина заситува, консумирате храна со празни калории, значи сè што дебелее, не дава сила и не го потиснува апетитот“, велат нутриционистите.
Мени – „Изберете млеко, интегрални снегулки и свежо овошје за појадок“, советува д-р Гарнероне. „И пијте што повеќе негазирана вода која ќе го зголеми обемот на влакната. За ручек задолжително испланирајте порција месо, риба или сирење, со зеленчук по ваш избор како прилог. И размислете малку за компирот: еден среден, печен или варен, заситува повеќе од сендвич или кроасан и има само 56 калории.
Фото: Pixabay
