Високите температури и високиот степен на влажност во воздухот се идеални услови за раст и размножување на патогени бактерии кои предизвикуваат труење со храна. Труењето со храна означува болести предизвикани од консумирање на расипана храна или пијалак, и обично е предизвикано од бактерии како што се E. Coli, Salmonella, Campylobacter, Shigella и најчестата причина – Staphylococcus aureus или вируси како што се норовирус, ротавирус, аденовирус.
Најчестиот симптом на труење со храна е дијареја, исклучително непријатна и многу честа тегоба, а во летните месеци е поголема веројатноста од зараза.
„Со оглед на времетраењето на симптомите, акутната дијареја е состојба кога симптомите траат помалку од 14 дена. Симптомите обично започнуваат од 12 часа до четири дена по влегувањето на патогенот во организмот и се смируваат по три до седум дена. Во формите на болеста може да доминира повраќање, особено во почетокот, што е почесто кај вирусна дијареја и интоксикација со токсини од храна.
Чести грешки при купување, подготвување и чување храна и остатоци од храна
За среќа, постојат работи на кои можете да внимавате за да ја намалите можноста за зараза. Во спречувањето на дигестивните проблеми, хигиената е клучна при подготовката на храната.
Превенцијата вклучува избегнување на консумација на непастеризирано млеко, миење на сурово овошје, чување на сурово месо и риба одвоено од друга храна, миење раце и прибор по преработка на сурова храна. Храната од животинско потекло треба да се готви добро исто како и морските плодови и јајцата и зготвената храна на собна температура не треба да се остава повеќе од два часа.
Несвесно правиме некои грешки затоа бидете внимателни.
Недоволна хигиена
Пред подготовка и сервирање на храната, темелно измијте ги рацете и површината на која ја ставате храната, добро измијте ги и овошјето и зеленчукот. Ако имате симптоми како што се дијареја или повраќање и отворени рани и исеченици на рацете, избегнувајте подготовка на храна. Миењето на рацете со сапун и вода е ефикасна мерка за превенција, а дезинфекцијата со алкохол ќе ви помогне, особено кога сте надвор и немате пристап до проточна вода и сапун.
Неправилно складирање храна
Кога купувате храна, веднаш штом ќе се вратите дома, ставете ја расипливата храна во фрижидер – месо, риба, јајца. Никогаш не купувајте храна со оштетена амбалажа и надуени лименки. Одржувајте ја температурата во фрижидерот постојана, 4°C и температура на замрзнувачот, -18°C. Фрижидерот не смее да биде преполн, така што воздухот да може слободно да циркулира.
Свежата храна треба да се стави во фрижидер во рок од два часа. Месото што не е замрзнато треба да се искористи во рок од два дена (риба, живина) до пет (телешко, јагнешко, свинско, говедско). Свежото и лесно расипливо месо треба внимателно да се завитка за да се спречи „истекување“ на сокови од месото во фрижидерот и на другата храна.
Нераздвојување на намирниците
Свежото месо, живината и рибата не смеат да бидат во контакт со намирниците што се јадат без претходна термичка обработка, на пр. со овошје и зеленчук. Можете да користите две различни плочи за сечење за да избегнете контаминација.
Одмрзнување и замрзнување
Замрзнувањето на-18°C ги уништува микроорганизмите – бактерии и мувла, но штом ќе се стопи замрзнатата храна, под поволни услови, овие микроорганизми повторно стануваат активни и се размножуваат со иста брзина како кај свежата храна, така што одмрзнатата храна треба да се третира исто како и свежата.
Недоволен термички третман на храна
Готвењето, печењето и пржењето мора да бидат на соодветни температури. Ако не сте сигурни дека храната е доволно зготвена / печена, можете да користите термометар за храна.
Неправилно складирање на преостанатата храна
Остатоците од храна секогаш чувајте ги во фрижидер. Никогаш не оставајте ја храната надвор од фрижидер повеќе од два часа и не ја чувајте останатата храна подолго од два дена. И секако, не јадете храна што изгледа или мириса чудно.
Како да се лекува дијарејата и кога да се оди на лекар?
Ако сепак имате проблеми со варењето и дијареја, важно е да знаете што да јадете и пиете за да ги олесните непријатните симптоми и да го забрзате закрепнувањето.
Основната мерка во лекувањето на дијарејата е надополнување на течностите кои се даваат првенствено преку уста, раствори што содржат вода, соли (електролити) и гликоза. Лекарски преглед е потребен во тешки случаи на дијареја и кај хронични пациенти со намален имунитет.
Во тешки случаи, кога постои постојана температура, крв во столицата, значителна болка во стомакот, знаци на дехидратација како што се сува слузница, скудно мокрење, потемна урина, понизок крвен притисок, па дури и нарушување на свеста, потребно е да се консултирате доктор!
Фото: Pexels
