Почна и заврши и повторно ни ги наполни чантите и џебовите со многу нови визит-карти и каталози, а душата – со срдечните средби со старите пријатели и винарии.
Веќе 4 години по ред на истото место, во хотел „Мериот“, на 29. и 30.11 се одржа најголемата винска манифестација на затворено – „Винодонија“.
А таму, нашите најстари пријатели, г.Ристо Ташев и неговиот син Урош од винаријата „Тристо“ кои никогаш не се здодевни и исти, напротив, секогаш имаат новости – лани тоа беше пенливо вино, а годинава – новото розе, ’женско’, како што рече г.Ристо.
Малку полево уште еден познат лик, оној на Сашко Андов, енолог и наследник на малата семејна винарија Ерос која ја почнал неговиот татко Душко Андов пред 20 години. Неговата мисија денеска, освен да продолжи со производство на вино во семејната винарија е враќањето на винската сорта Станушина во редот на квалитетни автохтони македонски сорти на што работи во соработка со Слоу фуд Македонија како и афирмација на производите од Станушина, како што се, вино, маџун, ракија, гроздов сок и други, и полесно поврзување на производителите со крајните консументи.
Неговиот сограѓанин и колега Ѓорѓи Наумчев од фамилијарната бутик винарија од Кавадарци „Ѓи Ем Ен Наумчеви“ кој создава вино со посебно внимание и љубов, почитувајќи го биодиверзитетот на Македонија и славните микролокалитети Бегниште и Фариш и неговите висококвалитетни Траминец, Темјаника и Станушина се одамна познати меѓу винските љубители. На Винодонија 2019. имавме можност да го пробаме и најновиот премиум Вранец барик направен во строго ограничени минимални количини.
Тиквеш, Стоби, Камник, Далвина, и една нова на нашиот пазар, со познато име – ’Ферари’, и многу други, повеќе од 50 винарии кои понудија повеќе од 450 различни етикети. И секако, повеќе интересни работилници и предавања. За жал, ние бевме само на една, на темата „Запознај ја винска Црна Гора“ на која говореше винскиот новинар Ивана Бољевиќ, која не запозна со, според неа, најдобрите и најинтересните црногорски вина.
Сѐ на сѐ, уште една интересна, бучна и забавна Винодонија. И да не заборавиме, тука имаше и неколку работи кои одлично одат со виното, а тоа се пармезаните, моцарелите, намазите од тартуфи, чоколадните изработки на госпоѓа Викторија и убавите празнични декорации на ’Fine wine’ кои ѝ дадоа на оваа манифестација и една мала нота на претпразнична магија.
